Ikastaroaren balorazioa

Urria amaitzear dagoen honetan ikastaroa bukatzeko ordua heldu da.

Oso hilabete gogorra izan da neuretzat: eskolako lana, etxea, 16 hilabeteko txikitxoa eta batera bi Prest Gara, on-line biak, egiteko beharra. 
Ez nintzela helduko zirudien arren ez da hainbesterako izan!

Ikastaroaren hasieran esan nuen bezala duela zenbait ikasturte PLEaren lehenengo hurbilketa egin nuen eta oraingoan bertan ikasitakoa finkatu eta ezagutza berriak ere eskuratu ditudalakoan nago. 
Orain hau guztia martxan ipintzeko beldurra alde batera uztea besterik ez zait falta!

Pertsonalki asko ikasi dudalakoan nago, nire PLEa behingoz antolatu dudalakoan nago, Symbaloo erramientari etekina ateratzen hasi beharko naiz orduan! 

Feddlyri dagokionez interesekoak ditugun web orriak edota informazio iturriak kontsultatzeko ere bikaina iruditu zait.

Gainera, Diigon outlinerra sortzeko aukera asko gustatu zait. Aurretik classroom erabili izan dut, baina, ezagutu gabe Diigok informazioa on-line bilatzeko aukera hobeak eskaintzen dituelakoan nago.

Bestalde, proiektuen bidez talde lan kooperatiboak egiteko Twitter sare sozialak eskaintzen dituen aukerak ez nituen ezagutzen nahiz eta erabili izan dudan beste gai batzuk lantzeko.

Honekin guztiarekin agurtzea besterik ez zait falta, 

Laster arte irakasle eta kurtsokide guztiei!

Plazer bat izan da!

                        

Instagram

Ikastaroa aurrera doa eta konturatu gabe amaierara hurbiltzen gaude!

Aste honetako lana Instagramen erabilera eta hezkuntzan dituen aplikazioak, hain zuzen ere.

Egia esan ekintza hau burutu arte ez dut pentsatu inoiz Instagram gela batean erabil zitekeenik..., baina, ... egun gainera proiektuen bitartez lan egiten hasi garela eta gure etorkizuna hezkuntzan proiektuen bidez lan egitera bideratu behar dugula aintzat hartuta baliabide interesgarria izan daitekeela uste dut zenbait kasutan:

- Argazkietan idazteko aukera egonda aukera paregabea izan daiteke proiektu baten bilakaera azaltzeko.

- Horretaz gain, ikas komunitatearekin ikastetxean burutzen diren proiektuak eta ekintza osagarriak partekatzeko erabili daiteke.

- Interesgarria da ere Instagram, Twitter, Facebook eta Tumblr binkulatuta edukitzeko posibilitatea. Oso gutxi ezagutu arren, gela bakoitzarekin "mikroblg" bat sortuz gero aukera asko eman ditzakeela pentsatzen dut informazioa partekatzeko, antolatzeko eta gogoeta egin ahal izateko.

Nire Instagrameko erabiltzailea "janireestradaahedo" da. Ariketa honetan bete beharreko atazak hiru argazki partekatzea eskatzen zuen. Hauexek neureak:

- Ernalketa:

- Zientziak ere alderdi barregarria duelako:

- Liburu interesgarria:

Jarraian Twitter, Facebook eta Tumblr-ren egindako ekarpenen argazkia ikusgarri daukazue:

- Twitter:

- Facebook:

- Tumblr:

Zenbat ikasten ari naizen ikastaro honekin! Hemendik aurrera beldurra alde batera utzi eta klasean ikasleekin martxan ipintzea besterik ez zait falta!

Facebook vs. Twitter

Oraingo honetan beste sare sozial bat erabiltzea tokatu zaigu: Facebook.

Aspaldi erabiltzen dudan sare soziala da. Egia esan gustuko ditudan orriak irakurtzeko erabiltzen dut edo herrian gertatzen diren gora beheretaz jabetzeko. Normalean ez ditut argazkiak igotzen ezta publikazio zuzenik egiten ere. Soilik, gustatzen zaizkidan berriak edo egoerak partekatzen ditut.

Egia esan facebook hezkuntzako baliabide bezala erabiltzea ez zait inoiz burura etorri. Guk ikastaro honetan egin dugun moduan talde pribatu bat sortu daiteke eta bertan klaseko ikasle guztiak sar daitezke, materiala ere igo daiteke eta aukera ematen du adituen orriak jarraitzeko edo beste talde batzuetan, adituak direnak gai konkretu batean, sartzeko baimena eskatuz gero. 

Baina, gaur egun gizartean oso errotuta dagoen sarea da. Pertsona askok eguneroko pasarteak kontatzeko erabiltzen dute, erakunde edo elkarteek iragarkiak publikatzeko erabiltzen dute, ..., beraz, neure uste apalean sare sozial honen ezaugarria "informala" izatea da eta hezkuntzak "formaltasun" kutsua eduki beharko lukeelakoan nago.

Twitter duela denboraldi bat egindako ikastaro baten harira erabili nuen estrainekoz. Nire erabiltzailea @PleaJanire da. Ikastaro horretan erabili nuenetik ez dut orain arte berriro erabili. 

Orain, facebook eta twitter-ren arteko hautua egin beharko banu klasean erabiltzeko twitter aukeratuko nuke, izan ere, kutsu serioagoa duelakoan nago, taldeak ere sor daitezke, gai baten inguran informazioa bilatzeko hitz gakoak erabilita nahikoa da, normalean twitter-en adituek idazten dute eta publikazioak formalagoak dira, besteak beste.

Ikastaroan hiru taldeetan eskatu dut partaidetza: 

- Docentes, 42.073 partaide ditu eta hezkuntza esperientziak partekatzeko helburua dauka.

- CREAR (Compartiendo Recursos para la Enseñanza y el Aprendizaje en Red): 6.858 partaide ditu eta baliabideak, esperientziak, iritziak, etab. partekatzeko erabili daiteke.

- La semana del proyecto: 368 partaide ditu eta proiektuak partekatzen dira.

Gainera, biología sin fronteras eta biología digital orriak jarraitzen hasi naiz. Lehenegoak, biologiaren lotutako galderak eta erantzunak biltzen ditu eta bigarrenak, zientziaren dibulgazioa du helburu nagusi.

                                

Twitter

Ikastaroa aurrera doa eta oraingo honetan twitter erabiltzea tokatu zaigu!

Kontua duela pare bat urte sortu nuen beste ikastaro baten harira, baina orain arte berriro ez dudala erabili aitortu beharra daukat!

Nire erabiltzailearen izena bertan @PleaJanire da, izan ere, egindako ikastaro horrek ere norberaren PLEaren gaia jorratzen zuen.

Hau da nire agurraren esteka, ikusi nahi baduzue klikatu besterik ez duzue egin behar: https://twitter.com/PleaJanire/status/1052113264858095616.
Ariketa honetan twitter-en hainbat ariketatxo erraz egitea proposatu zaigu. Bertan kuxkuxeatu ditzazkezue!

Orain arte ez dut twitter baliabidetzat hartu, baina neure ustez irakasleen artean zein irakasle eta ikasleen arteko komunikazioa ahalbidetzen duen sare soziala izan daitekeelakoan nago. Ikastaro honetan egin dugun bezalaxe hastag komun bat erabiliz irakasleen eta ikasleen arteko komunikazioa areagotzeko iragarki taula moduan erabili zitekeen.

Gurasoak informatzeko ere erabili daitekeelakoan nago. Are gehiago, gurasoek aukera izango lukete klaseko egiten direnen lanen gaineko informazioa jasotzeko eta gertutik euren seme-alaben hezkuntza prozesua jarraitzeko.

Gainera, esteka eta baliabide interesgarriak partekatzeko aukera ematen du eta talde desberdinen arteko informazioa partekatzeko ere bai.

Twitter, azken finean, norberaren PLEaren erramienta potentea izan daitekeelakoan nago eta hemendik aurrera neure egunero lan esparruan barneratzeko ahalegina egin beharko nukela uste dut.

Diigo

Gaur zubia hasi baino lehen Diigo ezagutzea erabaki dut, jai egunak ikastaroko lan guztiak amaituta edukita hasteko prest!

Bideoak ikusi ditudanean eta Diigo-n estraineko aldiz sartzerakoan apurtxo bat ikaratu nahiz hainbeste baliabide eta aukera duela ikusita! 

Baina, tira... ariketa egitea lortu dudalakoan nago eta hona hemen neure iritzia:

Oso erramienta ona izan daiteke ikastetxeetan lan kooperatiboa sustatzeko, izan ere, interneteko konexioa soilik izatearekin aukera dago mota anitzetako baliabideak, irakasleen edota ikasleen artean partekatzeko. Gainera, taldeak egiteko aukera interesgarria iruditu zait. Outliner-ra sortzea classroom-aren aukera berdintsua ematen du, eta oraindik erabili ez dudan arren abantailak eduki ditzakeelakoan nago informazioa plataforma berean, Diigo-n, eskuratzeko eta partekatzeko aukera baitago.

Asko gustatu zait bakoitzaren interesekoa diren taldeetara batzeko aukera izatea, horrela, informazio edo baliabideren bat bilatu behar dugunean benetan gai horretan eskuarki lotuta lanean dabiltzaten adituen lanak edo argitalpenak eskuratuko ditugulako.

Hutsuneei buruz hitz egitea momentu honetan oso zaila egiten zait gaur ezagutu berri dudalako. Bat aipatzekotan inprimatzeko aukera eza esango nuke, pantailaren argazkia egin beharko litzateke.

Interesgarria eta erabilgarria iruditzen zait Javier Carrillok aurkezten duen Portal de Actividades Educaticas multimedia-Educaplay plataforma, hezkuntza arloan multimedia-baliabideak sortzeko aukera ematen duenak. 

Neure Diigo-ko profila bisitatu nahi baduzue sartu zaitezte jarraian dagoen link-ean:

https://www.diigo.com/profile/janireestrada

Gainera, hemen daukazue ariketarekin lotuta DBHko 1. mailan Ekosistemak lantzeko sortu dudan outliner-raren esteka:

https://www.diigo.com/outliner/g4c5bl/Ekosistemak?key=w4c4m0mof3

Zein da elkarlanaren abiapuntua?

Gaur egun ikastetxe guztietan pil-pilean dagoen asuntua daukagu lankidetzarena. Hau da, ikastetxeei Gobernuak berak eskatzen die proiektuka lan egitea ikasleen gaitasunak modu bateratu batean lantzeko eta aniztasunari aurre egiteko, besteak beste, etorkizuneko gizabanakoak adimen anitzak garatu ditzaten etengabeko aldaketan bizi garen mundu globalizatu honetan. 

Baina, nola gauzatu aldaketa hau? 

Horretarako lankidetza edo elkarlana ezinbestekoak direlakoan nago, bai ikasleek modu bateratu batean kooperazioa eta kolaborazioa aldarri bezala hartuta bai eta irakasleok gure lanari dagokionez.

Neure uste apalean hezkuntza munduan lan egiten dugunok konziente gara etengabeko formazioa ezinbestekoa dela hezkuntza kalitatezkoa izango dela bermatzeko. 

Askotan, aurreko post batean adierazi dudan bezala, informazio gehiegirekin lan egiten dugu, beraz, norberaren PLEa eudukitzea lehenengo urratsa izan beharko litzateke irakasle bakoitzak bere irakaskuntza prozesuaren sarea osatzeko. 

Behin pausu hau emanda, sare sozialek berebiziko garrantzia dutelakoan nago, izan ere, gure ezagutza partekatzen ez badugu ez baita ezagutzera emango eta ondorioz, gure lanak ez duelako hezkuntza munduan eraginik edukiko. 

Baina, hezitzaile guztiak bat egitea zaila izan daiteke, izan ere, irakasle bakoitzaren errealitatea, arazoak eta erronkak ez dira berdinak. Are gehiago, normalean egunerokotasunean sortzen diren arazoekin eta lanarekin lepoz gainezka gabiltza eta pertsona askorentzat "lan extra" bat suposatuko lukeenez sarean lan egiteak ezetza emango lukete.

Hastearren, ondo legoke gai hauekin lotuta ikastaroak egiten ditugunok sarean lan egiten hastea lehenego aurrerapausuak eman izan baititugu jada. Hots, norberaren PLEari forma ematen hasi diogu, Symbaloo erramientaren bidez; Feedly baliabidea ere hasi gara dagoeneko erabiltzen gure intereseko informazioa bat-batean eta modu bateratuan ikusi ahal izateko. Beraz, lanaren erdia eginda daukagu jada!

Ondoren, bakoitzak bere ikastetxean lankideak animatu ditzakegu eta are gehiago, irakasle guztiok formakuntza egiten dugunez eta gai arrunta izanen denez IKT-ena, zergatik ez zuzendaritza taldeari proposatu ikasitakoa gainontzeko irakasleei irakastea?

…Sabemos cómo hemos comenzado; no

podemos decir dónde llegaremos. (…) Todos

hemos de cooperar. Aquí no hay uno sólo y los

demás son comparsa, sino que cada cual tiene

su sitio, su deber, su responsabilidad.

(P. Poveda, 1919)

Eta nola sortu dezakegu OLE-a gure ikastetxean? 

Linda Castañedak dioenez, Irakaskunta Ingurune Antolatzaileak bere baitan hartuko lituzke informazio iturriak, erramientak, ekintzak, mekanismo kognitiboak eta erakunde horretan parte hartzen duten pertsonen sarea ikasteko asmoarekin.

Beraz, OLE-ek zentzu handi batean erakunde bateko kideen PLE-ak bateratzeko aukera emango luke eta garrantsitzuena dena, partaideak beraien arteko lankidetzan arituko lirateke amankomuneko helburuak lortzeko.

Orduan, ikastetxe bat erakunde bat denez, bertako partaideek identitate digitala badute, hau da, PLE-a badute eta sare sozialetan modu aktibo batean parte hartzen badute, nahikoa izango litzateke elkarlana OLE-ak implementatzeko. 

Eta nola? Ba, formazioaz baliatuta, hau da, ikastetxeetan zuzenean lehentasuna ematen XXI. mendeko baliabide ezin hobe hauei!

Zer da Norberaren PLEa?

PLE, ingeleses Personal Learning Enviroment, norberaren irakaskuntza pertsonala kudeatzeko erabiltzen diren elementuek osatzen dute, besteak beste, baliabideak, ekintzak eta informazio iturriak, esaterako.

PLEak, beraz, irakaskuntza esparruan eta edozein lan eremuan erabili delakoan nago. Alde batetik, norberak sortzen dituen informazioa eta ezagutzak biltzeko eta bestetik, informazio hau guztia internet duen edonorrekin partekatu ahal izateko. Era berean, pertsonok gure PLEa erabili dezakegu gure informazio iturriak edo informazio sortzaileak modu bateratu batean eskura edukitzeko.

Neure uste apalean, irakasleok urtero urtero informazio eskerga jasotzen dugu eta sortzen dugu ere bai, eta askotan ikastetxez aldatzean egindako lan guztia pikutara doa, horrek suposatzen duen galerarekin. 

Beraz, norberaren PLEa Symbaloo moduko baliabide batean txertatuta erramienta paregabea izan daitekeelakoan nago!

Symbaloo: Neure webmix-a

 https://www.symbaloo.com/mix/918-plejanire1 

Berez aurreko post-ean aurkeztu behar bazen ere, ez dut lortu webmix-a bertan integratzea. Horrexegatik post labur hau, neure webmix-a aurkezteko.

Espero dut zuen gustokoa izatea! 

Laster arte!

PLE

Oraingo honetan Symbaloo erabili behar izan dugu. Symbalook baliabide garrantzitsuak elkartzeko eta parterkatzeko aukera ematen duen erramienta da.

Symbalook norberaren PLEa antolatzeko egokia iruditzen zait, izan ere, baliabide digital honetan nahi ditugun helbide eta baliabide interesgarriak gorde ditzakegu modu erraz eta oso bisualean. Honek guztiak, beraz, norberaren PLEa, norberaren ikaskuntza pertsonalean etengabeko onura sor dezakeelakoan nago.

Symbaloo erremienta aurreko ikastaro batean ezagutu nuen eta garai horretan erabili behar nuelako erabakia hartu nuen baina orain arte ez dudanez erabili... orain da momentua berriro martxa hartzeko!

Aurkezpena: Blogger eta Padlet

Ikastaro berri baten harira ikasten ari nintzeneko blog hau berreskuratzea egokia iruditu zait. 

Ikastaroa, zehazki, duela pare bat urte egindako batekin lotura estua duelakoan nago. Norberaren PLEa eta irakaskuntza inguruneekin erlazioa zuzena du, hain zuzen ere.

Lehenengo ariketa honetan, blog-a sortzea eta PADLET-en aurkezpena egiteko eginkizuna izanik hona hemen neure aurkezpena:

https://padlet.com/cpmngaratu/hcd5iggzn2i2

Padlet oso interesgarria izan daiteke ikasleekin lan kooperatiboak eta kolaboratiboak egiteko. 

Nire PLEa

Argi dago lanbide guztietan formazioa etengabekoa eta jarraia izan behar duela, baina, hezkuntza munduan are gehiago. Irakasleook gure ikasleei baliabide egokiak eta garaian garaiko teknologia aurrerapenekin lotura estua dutenak eskaintzen saiatu beharra daukagu.

Norberaren PLEa ikastaro honekin nire lan ohiturak eraldatu nahiko nituzke. Gauzak horrela, materiala antolatzea eta hainbat programa berri, prezi esaterako, edo bideo muntaiak egiten ikastea gustatuko litzaidake.

Google Drive: Zelan erabili ikasgelan? Zeintzuk dira Dropbox-ekin dituen aldeak?

Duela egun batzuk, Google Drive sarean informazioa dohainik gordetzeko plataforma bezala aurkeztu zen, eta ez hori bakarrik Dropbox-en alternatiba bezala ere jaiotzen dela esan beharra dago. 

"La tecnología de almacenamiento en la nube es un recurso TIC muy útil y cada vez más imprescindible para el profesor y el alumno a nivel académico. Con esta tecnología los profesores y alumnos pueden almacenar y compartir documentos, fotos y videos en la nube para tenerlos accesibles desde cualquier ordenador."

Jarraian dagoen estekan informazio osatua eskura daukazu, bertan erabilera bideak eta Dropbox-ekin dauden aldeak era erraz batean azaltzen direlarik:

http://www.totemguard.com/aulatotem/2012/04/google-drive-como-usarlo-en-el-aula-y-diferencias-con-dropbox/

Swÿp: Hezkuntzan erabilgarria izan daitekeen baliabide berria

Internet-eko albistegi bat irakurtzen nengoela honako berriarekin egin dut topo: gailu ezberdinen artean fitxategiak partekatzeko tresna sortze bidean dagoela. Honako erramienta hau hezkuntzarako erabilgarria izango delakoan dago, beraz, informazioa hemen uzten dizuet eta harekin batera bideo tutoriala prozesua zelakoa den ikus dezazuen.

"Swÿp: gailu ezberdinen artean fitxategiak trukatzeko tresna... hatzen mugimendu hutsez"

Hainbat gailu dituzula (tableta, smartphonea...) eta horien artean argazkiak edo fitxategiak trukatu nahi dituzula? Esku hutsez egin ahal izateko programa garatu dute: Swÿp transfer with a swipe of a finger. Ipini bi gailuak elkarren ondoan eta hatz kolpe bakarraz eraman ditzakezu fitxategiak batetik bestera. Oraingoz garapen fasean dago eta iOS-ekin bakarrik dabil.

Informazio gehiago nahi baduzu:

http://sustatu.com/1336474995

Elkarlaneko idazketa ikasgeletan

Pasaden hilabetean, apirilean, jaio berri den proiektu bat aurkeztu nahi dizuet. "Coompone" proiektuak elkarlaneko idazketaren bitartez ikasleek abestiak eta  olerkiak idatz ditzaten du helburu nagusitzat. 

"Coompone" web gunean olerki eta abestien letrak elkarlanean arituz eraikitzen dira erabiltzaileek egindako proposamenetatik abiatuz. Irakasleek olerki edo abesti bati hasiera eman diezaiokete gaia proposatuz edo lehenengo esaldia idatzita, era berean, ikasleek beraiek ere libreki gaia aukeratu dezakete.

Informazio gehiago nahi baduzu jo ezazu "Coompone"-ren web orrialdera:

http://www.coompone.com/

Altxorraren bila

“Altxorraren bila” formatua oso ezaguna eta erraza da, IKT-en integrazioa geletan lortzeko eta Internet informazio iturri gisa erabiltzeko ikasgela lanerako. Horrelako lan proposamenek, batez ere, hizkuntza trebetasunak garatzen, web ulertzeko prozedurak hobetzen, datuak prozesatzen eta testu ekoizpena buruzko informazioa aurkitzen… laguntzen diete ikasleei. Ikasteko funtzionalitatea eta ikasleen parte-hartze aktiboa bermatzen dute, ikasleen benetako interesetan, gai erreal eta hurbiletan oinarritzen direlako.

Informazio gehiago eskuratu nahi baduzu jo ezazu ondorengo estekara:

http://edutec.rediris.es/Revelec2/revelec16/adell.htm

Sortze-matematikak Gauss Proiektuarekin

Gauss Proiektuaren bidez irakasleok item didaktikoak eta kode-zabaleko Geogebra applets-ak eskura izango ditugu. Hauek lehen hezkuntzako 5. eta 6. mailako eta Derrigorrezko Bigarren Hezkuntzako 1. eta 2. mailako eduki guztiak asetzen dituzte. Unitate hauek arbela digitalean zein ikasleek beraiek dauzkaten ordenagailuetan erabiltzeko diseinatuta daude.

Informazio gehiago irakurri nahi baduzu kontsultatu ondorengo esteka, bertan materialak ikus ditzakezu!

http://recursostic.educacion.es/gauss/web/

Zeinu hizkuntza: pertsona gorren isolamendua hausteko baliatu nahi ditu QR kodeak Ikun enpresak

Pertsona gor gehienek irakurtzen eta idazten dutenaren %20 baino ez dute ulertzen. Izan ere, zeinu hizkuntza da gorrek informazioa bereganatzeko daukaten baliabiderik onena. Bilboko Ikun enpresak egunotan hain modan jartzen ari diren QR kodeak baliatu nahi ditu idatzitako informazioa zeinu hizkuntzara egokitu eta bideo formatuan entzumen arazoak dituztenei eskaintzeko.

Amagoia Mujika

2012ko Apirilaren 13a

Egoitza Bilbon duen Ikun enpresak proiektu berezi bat dauka esku artean; idatziz dauden edukiak pertsona gorrentzako egokiak eta ulergarriak egitea helburu duen proiektua. Janire Alonso interpretea da eta Iñigo Perez diseinatzaile grafikoa eta teknologia berrietan aditua. Bi mundu elkartu eta biek batera bide interesgarria ibil dezaketela ikusita abiatu dute egitasmoa.

Haurrengan eta hezkuntza munduan dituzte begiak jarrita bereziki. Izan ere, Janire Alonsoren hitzetan «hezkuntza sistemak historian zehar izan dituen gabeziengatik eta egokitzapen faltagatik, entzuleen aldean hezkuntza maila atzeratuagoa daukate pertsona gorrek. Batez ere irakurketa eta idazketa mailan».

Ahozko hizkuntzaren egitura eta zeinu hizkuntzarena erabat desberdinak dira. «Hala ere, gorren hezkuntzan historikoki erabili izan den hezkuntza eredua pertsona entzuleekin erabilitako bera izan da. Ondorioz, pertsona gor batek idatzitako testu bat hartzen duenean –izan gaztelerez, euskaraz edo beste edozein hizkuntzan– ez du apenas ulertzen», jarraitu du Alonsok berak.

Datu orokorren arabera, pertsona gor gehienek irakurtzen eta idazten dutenaren %20 baino ez dute ulertzen. Horregatik, profesionalek garbi dute zeinu hizkuntza dela gorrek informazioa jasotzeko daukaten baliabiderik onena, hori dela hizkuntza bereganatzeko eta ezagutza orokorrak barneratzeko «bitarteko hizkuntza» egokiena. «Hitzak eta esaldi errazak uler ditzake pertsona gor batek. Baina hizkuntzak egitura oso konplexua dauka eta mendeko esaldiekin hasi orduko galdu egiten da. Eta hiztegi mailan ere eskasia dute», agertu du Janire Alonsok. «Egia da urte batzuetatik hona aurrerapenak egin direla eta zeinu hizkuntzako interpretea sartu dela hezkuntzan, baina historikoki hezkuntza sistemak ez dio behar duen garrantzia eman zeinu hizkuntzari eta oraindik asko dago egiteko alor horretan», segitu du. Egin beharreko horietako bat, dagoen hutsunetako bat, materialari dagokiona da, ez baitago zeinu hizkuntzan oinarritutako materialik.

QR sistema

Hartara, eta teknologia lagun, dezente ahaztua izan den kolektibo horrengan jarri dute arreta Ikunekoek. Eta horretarako gaur egun asko zabaltzen ari diren QR sistemak aukeratu dituzte. «QR kodeek web lotura bat bezala funtzionatzen dute. Horiekin web helbide batera irits zaitezke eta gune horretan edozer gauza jar dezakezu: argazkiak, testu idatziak, bideoak... Guk ikusi genuen QR sistema oso erabilgarria izan daitekeela pertsona gorrentzako».

Gero eta gehiago ari dira zabaltzen QR kodeak. «Gaur egun batez ere publizitate mailako erabilpena ematen zaie. Normalean, enpresa baten webgunera zaramatza QR kodeak. Ez zaio benetako erabilgarritasuna ematen. Gure proiektuarekin benetako erabilgarritasuna eman nahi diogu. Gorrek informazioa jasotzeko hainbeste oztopo izanda, aukera paregabea ikusi dugu QR kodeetan modu errazean eta sinplean informazioa berentzat ulergarria den moduan helarazteko».

Ikunekoek proposatzen duten ariketa honakoa da: lehendabizi testua zeinu hizkuntzara egokitu eta hori bideo batean jasotzea; eta, ondoren, QR kode baten bidez testutik bideorako lotura egitea. «Sistema hori erabiliz material didaktikoa zeinu hizkuntzara egokitzea da gure proiektuaren helburua», azaldu du Iñigo Perezek.

Gainera, proposatzen duten ereduak funtzio bikoitza dauka; «batetik, zeinu hizkuntzaren bidez testuaren ulermenean laguntzen dio pertsona gorrari, eta, bestetik, testua bera eskura daukanez, irakurketa ere landu eta hobetu dezake», segitu du Perezek. Beraz, sistema mistoa da proposatzen dutena, bere baitan zeinu hizkuntza eta hizkuntza idatzia hartzen dituena. «Onena izango litzateke pertsona gorrak elebidunak izatea, hau da, ahozko hizkuntzaren eta zeinu hizkuntzaren bidez jasotako informazioa bateratzea. Eta hori da proiektu honen asmoetako bat».

QR kode bat irakurri ahal izateko nahikoa dira telefono edo dispositibo eramangarri bat eta Interneteko konexioa. Badira QR kode irakurgailua daukaten telefonoak edo gailuak eta bestela dohainik aktiba daiteke kodeen irakurketarako aplikazioa. «Telefonoarekin kodea harrapatu eta segundo batzuetan kargatzen du bideoa. Erraza eta azkarra da», esan du Perezek.

Dagoeneko egin dituzte saio batzuk zenbait material didaktiko zeinu hizkuntzara egokitzen. «Abiatzen ari gara, batzuekin eta besteekin hitz egiten. Bizi ditugun garaiotan ez da erraza inor abentura berrietan abiatzea, baina tira. Urtxintxarekin, Ikastolen Elkartearekin, Pirritx eta Porrotxekin aritu gara hizketan eta gustatu zaie ideia. Urtxintxa Bilboko aisialdi eskolarekin bai abiatu dugu elkarlana. Epe laburrean ipuin bilduma bat kaleratuko dute eta ipuin horiek QR kodeak izango dituzte, zeinu hizkuntzara egokitutako bideoetara iristeko», jarraitu du Alonsok.

Bidean abiatzen ari direla esan daiteke, pertsona gorrek bizi duten isolamendua teknologia berrien laguntzarekin hausteko asmoa duen proiektuarekin. «Ez da erraza izango, krisi garaian gutxiengo baten beharrak bigarren maila batera pasatzen direlako», bukatu du Janire Alonsok.

Iturria: Gara

Klikasi, klik eginez ikasi

Azkue Fundazioak Klikasi sortu du, eduki didaktikoak euskaraz batzeko Multimedia Gunea, hain zuzen ere.

Euskaraz baliabide gutxi aurkitu ditzakegu eta askotan euskaldun irakasle eta ikasleek ikasteko baliabideak beste hizkuntza batzuetan ikustera eta erabiltzera behartuta gaude. Hau dela eta, Azkue Fundazioak Multimedia Gune hau sortu du, euskarazko baliabideen sorkuntza bultzatu eta denak batzen dituen gune bat izateko.

Klikasi web guneak, "klik eginez ikasi" esan nahi du, euskaldun ikasleek teknologia berrien bitartez ikasteko aukera izan dezaten eta ikastetxeetan ere sortzen dituzten baliabide didaktikoak partekatzeko aukera izateko.

Lehiaketa

Multimedia Gune honi lehenengo bultzada emateko Klikasi deitutako lehiaketa sortu du Azkue Fundazioak. 

Lehiaketaren helburuak honako hauek dira:

1. Irakaskuntzarako euskarazko multimedia baliabideak ugaritu Multimedia Gunean.

2. Ikastetxe, ikasle eta irakasleak saritu beraien lanengatik.

Lanak aurkezteko epea 2011ko Azaroaren 2an hasi zen eta 2012ko Maiatzaren 31n bukatuko da.

Informazio gehiago kontsultatu nahi baduzu jo ezazu hurrengo estekara:

http://klikasi.azkuefundazioa.org/

AnHitz, zientzia-aditu euskaldun... birtuala

Imajina ezazu, edozein unetan, behar duzunean, zientzia- eta teknologia-gaiei buruzko galderei erantzuteko gai den aditu bat duzula zure ondoan. Bada, 2008. urtean ospatu zen Zientziaren, Teknologiaren eta Berrikuntzaren Astean, aditu  hori ezagutzeko aukera izan zuten Donostiako eta Bilboko zientzia-karpetan izan ziren bisitariek.

Zientzia-aditu horrek AnHitz izena du, eta, bi zientzia-karpa horietan ez ezik, Bilbon egin zen hizketaren teknologiei buruzko kongresuan ere aurkeztu zuten. AnHitz pertsona birtual bat da; zehazki, emakumezko-itxura du, eta zientziari edo teknologiari buruzko galderak erantzuteko gaitasuna du, euskaraz.

AnHitz oso abegikorra da, eta, lehenik, erabiltzailearekin harremanetan jartzen da. Izena galdetzen dio, eta haren ahotsa ezagutzen du. Jarraian, aukera ematen dio galdera jakin bat egiteko edo gako-hitzen bidez informazioa bilatzeko. Erabiltzaileak zer nahi duen adierazten dionean, AnHitzek informazioa bilatzen du Interneteko zientzia eta teknologiako hainbat datu-basetan. Erantzuna topatu orduko, berriz, hitzez jakinarazten du.

Horrez gain, erantzuna zer testutatik atera duen ere erakusten du, idatziz. Eta testu horien izenburua ere irakurtzen du, hala eskatuz gero, euskaraz edo jatorrizko hizkuntzan. Izan ere, informazioa hiru hizkuntzatan bilatzen du: euskaraz, gaztelaniaz eta ingelesez. Gero, euskarazkoak bere horretan erakusten ditu, gaztelaniazkoak euskarara itzultzen ditu, eta ingelesezkoak jatorrizko hizkuntzan ematen ditu. Gainera, testuen izenburuan klik eginez gero, haien jatorrizko web gunera bideratzen du erabiltzailea.

Hori guztia lortzeko, beharrezkoa da teknologia bat baino gehiago uztartzea. Hala, Euskal Herriko bost eragile aritu dira elkarlanean: Elhuyar Fundazioaren I+G unitatea, EHUren Ixa eta Aholab taldeak, eta VICOMTech eta Robotiker zentro teknologikoak.

Bakoitzak berea, eta denek elkarrekin

Bostak 2006an hasi ziren lanean, pertsonak eta gailuak elkarrekin komunikatzeko behar diren hizkuntza-teknologiak garatzeko eta ezagutzak modu naturalean kudeatzeko helburuarekin. Helburu orokor horretara iristeko, eragile bakoitza alderdi batean edo bestean aritu da lanean.

Esate baterako, pantailan agertzen den emakumezko-itxurako pertsonaia birtuala VICOMTechek garatu du. Aipatzekoa da hiru dimentsiokoa dela, eta emozioak adieraz ditzakeela. Pertsona errealaren antza izateak komunikazioa errazten du, eta Donostiako zientzia-karpan, behintzat, hori frogatzeko aukera izan zuten Elhuyar Fundazioaren standean zeuden kideek: bisitari batek baino gehiagok galdetu zion Elhuyarkoari pantailan zegoena bera ote zen. Alegia, ez zioten robot-itxura hartzen AnHitzi, baizik eta hezur-haragizko pertsonarena.

EHUko Aholab taldeak eta Robotiker-Tecnalia ikerketa-zentroak, berriz, ahotsaren ezagutzan eta sintesian trebatu dute. Horri esker, AnHitz gai da euskalkiak eta hitzak ahoskatzeko hainbat aldaera ezagutzeko, eta berak euskara batuan hitz egiten du. Bestalde, galderei erantzuteko sistema eta Interneteko dokumentuak euskarara modu automatikoan itzultzeko gaitasuna EHUko IXA taldeari zor dizkio. Azkenik, dokumentu eleaniztunak bilatzeko abilezia Elhuyar Fundazioaren I+G taldeak egindako lanaren ondorioa da.

Dena den, AnHitz ez dago erabat bukatuta, prototipo bat da. Oraingoz, zientzia- eta teknologia-gaietan baino ez da aditu, eta ez die galdera-mota guztiei erantzuten: nork, nor, noiz edo non galdetzaileekin egindako galderei erantzuten die ondoen. Baina AnHitzen atzean dagoen teknologia hobetzen jarraitzeko asmoa dute eragileek, eta, hala, litekeena da laster beste arlo batzuetako informazioa erauzteko gai izatea adibidez, beste datu-base batzuetan eginez bilaketa, eta baita beste era bateko galderei erantzuteko ere. Nork daki, beharbada, egunen batean, aireportu, museo edo denda batean egingo dugu topo AnHitzekin!

Iturria: GARA

Informazio honekin erlazionatutako beste artikulu bat irakurri nahi baduzu: http://www.euskadinnova.net/eu/enpresa-digitala-eu/albisteak/anhitz-proiektua-polonian-saritua/6001.aspx

IKTak Lehen Hezkuntzan

Ordiziako Jakintza Ikastolako Lehen Hezkuntzan, aspalditik ekimen interesgarriak burutzen ari dira IKTen esparruan. Ondorengo bideoan, bi talde desberdinen grabazioak aurkezten dira ohiko lan bat burutzen ari direla. 

Batetik, 1. mailako ikasleak (6 urtekoak) GCompris eta Tuxpaint lantzen ari dira. Deigarria da ikustea ikasle hauek zein naturaltasunez hartzen dituzten tresna eta aplikazioen "martingala" guztiak.

Beste alde batetik, 6. mailako bi ikaslek beste gelakideei Google Sites azaltzen ari dira. Itzela iruditu zait ikasle hauen lana eta ikaskideen jarrera.

Hau guztia, zalantzarik gabe, irakasleak berak daraman metodologia sortzaile eta aktiboari esker posible da, ikasleen jakin-mina etengabe piztea lortzen duelarik.